LI DUI SURGI
Un surgi, vecchiu latru di cucina,
Cci dissi a un surgi pezzu d’omu bonu:
“nesci, veni ccu mia ’ntra la cucina,
ca ddà faremo pranzu di bon tonu.
Frati, la megghiu vita è la rapina,
cui arroba campa ’ntra piaciri, e sonu,
veni ’nsemi ccu mia nna siritina,
prova, e ti sintirai rignanti ’ntronu.
A sti palori tantu seducenti
Lu bon omu ammuccau, si fici avanti,
e si ni jeru tutti dui contenti…..
Ma un gattu spiritusu, e vigilanti
Cc’ è di ’ncoddu, e li scanna cu li denti…..
Amaru cui si junci ccu birbanti !
G. Borrello
|
